OBRADOIRO DE COCIÑA SAUDABLE

 Entre a nosa colleita sementada na primavera pasada estaban as cabazas e os cabaciños, así que ademáis de comprobar o paso do tempo fixemos un obradoiro de cociña

PURÉ DE CABAZA

ABERTO POR DIVERSIÓN

 Comezamos o novo curso, este 2023/24 será a última estación neste cole para as nenas e os nenos da clase da bolboreta e do peixe globo, por iso tentaremos de pasalo moi, moi ben divertíndonos moito e aprendendo outro tanto.

E para iniciar o curso, que mellor cousa que recoller os froitos das plantacións na Horta Mancomunada feitas na pasada primavera, unha morea de hortalizas!

E para iniciar a diversión nada nos pode gustar máis que un obradoiro de cociña, así que decidimos facer SALSA DE TOMATE. Aprendimos o nome de distintos tipos de tomates, que non eran hortalizas propiamente ditas se non que os TOMATES en realidade son unha froita e que debemos consumilos axiña por que enseguida se pasan e podrecen.

Como xa temos moita experiencia este obradoiro resultounos moi doado de facer e a SALSA estaba boísima, mágoa duns tallaríns!

Seguiremos experimentando coas hortalizas, xa temos moitas ideas.

REMATANDO ABRIL E COMEZANDO MAIO

En abril, mes dos libros, os  venres foron de  monicreques e celebramos o  DÍA DO LIBRO cunha contacontos moi especial e moitas recomendacións lectoras que podedes ver no blog de Librín no seguinte enlace:

TODOS OS DÍAS SON LIBROS DE ABRIL

O último venres de monicreques tivo moita, moita maxia e correu a cargo do alumnado de 6º

MAXÍA

Rematamos o mes cun obradoiro e contacontos, no novo espazo creativo da nosa biblioteca espallada, titulado A GALIÑA DOS OVOS DE CONTO

Participamos na I Andaina Solidaria polo Día Internacional do Deporte, organizada polo Grupo de Intervención Xuvenil de Viveiro en apoio a asociación pola Saúde Mental da Mariña.

Para comenzar maio tivemos unha primeira semana moi intensa:

1º- recordando a celebración do Día da Terra, fumos trasplantar as nosas sementes que moi ben xermolaron no invernadoiro do patio.

2º-Tivemos un novo obradoiro no espazo creativo da biblioteca , nesta ocasión  emocións e arte. Aprendimos a fabricar pintura con fariña e pigmentos naturais da man da artista e veciña de Burela Adriana Pardo, despois asociamos as cores creadas a distintas emocións.

3º-subimos a plantar árbores autóctonas a San Roque coa colaboración dos axentes forestais de Medio Rural  e da Comunidade de Montes San Roque.

https://www.instagram.com/p/Cr0stFwtZtn/?igshid=NjZiM2M3MzIxNA==

4º-para rematar esta primeira semana visitounos unha odontóloga, Estefanía Regal, como parte do noso proxecto Edusaúde, que nos ensinou moitas cousas interesantes sobre os nosos dentes e os dos animais.

https://www.instagram.com/p/Cr3a8Ekt5bu/?igshid=NjZiM2M3MzIxNA==

ABRIL, LIBROS E ACTIVIDADES MIL

 Marzo rematou cunha morea de actividades e abril comezou con outras tantas.As nosas sementes xa xermolaron e dentro de pouco teremos que trasplantalas na horta mancomunada na que temos unha pequena leira.

Celebramos o Día do Libro Infantil cunha actuación de monicreques na nova biblioteca, podedes vela no blog de Librín. Logo debuxamos a Cocorico e pintamos con ovo e pincel.

Seguimos abrindo a escola ao medio, e fumos pasear polo paseo fluvial para investigar e apañar flores silvestres coas que facer algún obradoiro no novo espazo creativo. 

   

Tamén descubrimos que a flor do camelio é un marabilloso xabrón natural

E aquí tedes un xogo coas flores que xa coñecemos, pero cuidado  hai que descubrir as dúas que non son de xardín que son silvestres!!!

E por último esta semana pasada dentro do proxecto Terra recibimos a unha inspectora urbanística e a ratiña FUS FUS que nos contou contos de ratiños e moitas cousas interesantes de como coidar do noso patrimonio natural e cultural.

LEMBRANDO O MES DE MARZO

 Marzo coa chegada da primavera foi un mes cheo de alegrías, de xogos  e de actividades:

-Pasámolo moi ben nas Nogueiras recuperando a tradición do noso pobo de saír ao campo no DÍA DAS TORTILLAS

-Podedes ver outras actividade dos proxectos da biblioteca e INCLÚE-T no blog de Librín

-Nas nosas investigacións sobre as plantas e as flores tamén imos ver que pasa coas semente que plantamos na terra pero tamén con esquexes de plantas na auga. A volta das vacacións veremos que acontece. 

Para rematar o trimestre uns obradoiros interesantes, recortando e cociñando emocións.

VISITA AO SUPERMERCADO EROSKY

 

Unha excursión sempre resulta motivadora para novas actividades encamiñadas a crear hábitos saudables e convertelos en prácticas habituais dende a infancia.

Percorremos  todas as seccións do supermercado , onde nos explicaron un montonazo de cousas. As nenas e os nenos xa sabian moito e por iso adiviñamos moitos dos peixes da peixaría, moitas verduras.... Tamén aproveitamos para mercar os ingredientes da  receita que do 1º obradoiro de cociña, os pratos favoritos de PACA E CALIXTO.

E para rematar menuda sorpresa nos tiña preparada FINA, unha merenda moi, moi especial.

Aínda que as veces parece  complicado, os nenos e nenas poden comer máis variado tamén cando é un día de festa. Hoxe axudounos  o EROSKI a mostrarlles  platos divertidos a base de froitas. Sería moi interesante agora que vos acompañaran na cociña a preparar e participar do momento de facer a merenda. Aquí deixamos as ideas de Fina que foron todo un éxito .

É moi positivo presentar alimentos saudables en ambientes festivos .Debemos establecer unha asociación positiva entre festa e saúde. O importante é preparalos ben e de forma divertida e atractiva para as nenas e  os nenos,  lles chame a atención e desperte a súa curiosidade. Así que apostade por merendas e festas de aniversarios con comida saudable e divertida

A visita ao supermercado  EROSKI foi moi productiva e chea de agasallos, así que 

GRAZAS , GRAZAS E MÁIS GRAZAS EROSKI

Nós continuaremos no cole con obradoiros, clasificación dos alimentos, propiedades que nos aportan,...sempre de xeito lúdico co que conseguimos moitos dos obxectivos dos programas do centro e desta etapa onde a iniciación e consolidación de hábitos de saúde e sostibilidade son fundamentais.

 

IOGA

Esta semana tivemos un contacto diferente co Ioga. Natalia veu acompañada de Hugo que nos ensinou a relaxarnos coa axuda de diferentes instrumentos de madeira e os cuncos tibetanos. Tamén aprendemos a modular a voz coa axuda da Shruti Box. Aquí queda unha pequena mostra desta xornada tan interesante e enriquecedora.

 

 

Foi un pracer contar con especialistas coma eles. Ata a próxima.